Arjun aur Riya ki kahani ek dilchasp tasveer jaisi thi… bahar se sundar, par andar se dheere-dheere tukde-tukde ho rahi thi.
Arjun ke liye Riya “others” kabhi thi hi nahi. Dusre log uske liye sirf guzarti raaste the, par Riya uski manzil. Usne Riya ko apne dil ke ek khaas kone mein rakha tha, ek aisi jagah jahan koi aur kabhi pahunch hi nahi sakta tha.
Lekin Riya ko yeh baat samajh hi nahi aayi. Jab bhi Arjun usse zara bhi compare karta, woh turant gussa ho jaati. Aur irony yeh thi ki woh khud hi har waqt comparisons karti rehti thi. Har shikayat ek hi tarah ki hoti—
“Tum sabki sun lete ho, par meri nahi… Tum sabke liye kuch bhi kar lete ho, par mere liye hamesha excuses.”
Arjun ke dil mein ek aur tasveer bani thi. Uske liye Riya ek aaine ki tarah thi, jisme woh apni khud ki sachchai dekh paata tha. Usne kabhi use “others” ki shelf mein rakha hi nahi… kyunki us shelf par rakhe log uske liye sirf yaadein ban jaate the, aur Riya toh uski zindagi thi.
Par ek din, Arjun ko ek kadvi sachchai samajh aayi—
“Agar main Riya ko waise hi ‘others’ ki shelf mein rakh doon na, toh sabse pehle regret usse hi hoga. Kyunki main kabhi kisi ko wahan dalta nahi… log khud apne choices se us shelf mein chale jaate hain.”
Aur us din Arjun ne apne dil se woh tasveer utaar di.
Usne decide kiya—ab bas. Kahani yahin khatam.
Dil ka woh khaas kona phir se khaali ho gaya… aur Arjun ke liye, it was over. Forever.
